طريقة عمل الرقاق باللحمة المفرومة

طريقة عمل الرقاق باللحمة المفرومة

المقادير :

نصف ك دقيق

معلقة ص ملح

ماء للعجن
نصف ك لحمة مفرومة
بصل مبشور
ثوم
ملح
فلفل أسود
قرفه وجنزبيل
بهارات لحمه
ورق لورا
شوربة فراخ
سمن (تكون في درجة حرارة الغرفة)

طريقة العمل:

1- أول حاجه هنعمل عجينة الرقاق

هنجيب وعاء غويط ونحط فيه الدقيق والملح ونخلطهم مع بعض وبعدين نضيف الماء تدريجيا ونعجن كويس لحد ما تبقى عجينة ومش بتلزق معاكي وبعدين نغطيها ونسبها تستريح شويه

2- ثاني حاجة هنعمل اللحمة المعصجة
هنجيب وعاء ونحط فيه اللحمة المفرومة والبصل المبشور والثوم وجميع البهارات وبعدين نقلبهم كويس ونحطهم على النار من غير أي زيت أوسمن علشان تستوي في عرقها ويبقى طعمها روعه ونسيبها تستوي على نار هادئة
3- تحضير العجينة

أول حاجه هنقسم العجينة إلى كرات متوسطة الحجم ونفرش تحتها دقيق علشان نعرف نفردها وبعدين نجيب النشابة اللي هنفرد بيها العجين ونجيب أول جزء من العجين ونبدأ نفرده بالنشابة لحد ما تبقى رقيقة جدا وبعدين ندخلها الفرن ونستنى لحد ما تحمر من تحت ونطلع على طول ولو معندكيش فرن اعمليها في طاسة على البوتجاز بس هتصغري حجم العجينة علشان تتناسب مع حجم الطاسة وإن شاء الله هيطلع معاكي زى الفل ونكمل لحد ما تخلص الكمية
4- هنحضر صنية الرقاق
هنحط الشوربة في أي حاجة مفرودة  ونحطها على النار علشان نعرف نبل الرقاق وبعدين نحضر الصنية وندهنها بالسمن وبعدين هنجيب واحدة من الرقاق ونبلها في الشوربة ونرصها في الصنية ونكمل لحد ما يخلص أول طبقة وندهن سمن ونكمل باقي نصف الكميه وبعدين نحط اللحمة المعصجة ونكمل باقي الطبقات ونحط سمن بين كل طبقة والتانية لحد ما نخلص كل الكمية ولو حبيتي تحطي دور لحمة ودور سمنة مفيش مشكلة خالص هيبقى زي الفل وبعدين هنقطعها بالسكينة ونسقيها 3 كبشات شوربة ونحط علي وشها قليل من السمن علشان تعطي اللون الذهبي وبعدين ندخلها الفرن لحد ما تتحمر من تحت ومن فوق وتأخد اللون الذهبي الجميل

 وبشوية دقيق عندك تقدري تعملي أحلى صنية رقاق باللحمة المفرومة

وبألف هنا

‎مجموعة ‏محبي الأكل الصحي‎ Public group · 4 members Join Group 1- المحافظة على الاحترام المتبادل. 2- احترام اراء بعضنا البعض دون سخرية. 3- عدم التوجه بالكلام لشخص معين بشكل خاص في حال الاعتراض على رأيه. 4- يمنع...